Dyshohet se hyri ilegalisht nga Serbia, ndalohet një person në Leposaviq

Policia e Kosovës ka ndaluar një person në fshatin Bare të komunës së Leposaviqit, nën dyshimin se kishte hyrë ilegalisht nga Serbia në territorin e Kosovës, siç bën të ditur raporti 24-orësh i policisë, të cilin e transmeton RTK-ja.

Sipas raportit, rasti ka ndodhur më 16 tetor, rreth orës 16:00, kur njësia policore ka ndaluar një veturë me targa të Serbisë, të cilën po e drejtonte i dyshuari, shtetas kosovar.

Ndaj tij është iniciuar rasti për veprën penale “Kalim ilegal i kufirit”. Pas intervistimit, me vendim të prokurorit, i dyshuari është liruar në procedurë të rregullt.

Leposaviqi është njëra nga komunat veriore të Kosovës, përgjatë kufirit me Serbinë, ku strukturat e sigurisë përballen kohë pas kohe me raste të kalimeve jashtë pikave zyrtare kufitare.