FOKUS – 40% e rasteve të kancerit të gjirit mund të parandalohen përmes zgjedhjeve të stilit të jetesës

ROMË, 23 shtator /ATSH-ANSA/ – Nëse të gjitha gratë do të adoptonin stile jetese të shëndetshme, 40% e rasteve të kancerit të gjirit, i cili mbetet lloji më i përhapur i kancerit sa i përket incidencës dhe vdekshmërisë te gratë – nuk do të ekzistonin, deklaroi Riccardo Masetti, themeluesi i “Komen Italia”.

Bëhet fjalë për një fushatë kombëtare ndërgjegjësimi për kancerin e gjirit, të organizuar nga “Komen Italia” në partneritet me Ministrinë e Kulturës dhe, për herë të parë, me Ministrinë e Shëndetësisë.

“Kultura shëron,” theksoi Nënsekretarja e Kulturës, Lucia Borgonzoni.

“Me këtë fushatë, shpresojmë të arrijmë te shumë gra që përballen me vështirësi dhe e kanë të vështirë të kenë qasje në shërbimet e depistimit,” shpjegon Masetti.

Stili i jetesës sedentare dhe zakonet e dobëta ushqimore janë ndër faktorët kryesorë të rrezikut për llojin më të zakonshëm të kancerit që prek gratë italiane.

Ndikimi i stilit të jetesës

Sipas studimeve shkencore të konfirmuara nga Organizata Botërore e Shëndetësisë dhe Agjencia Ndërkombëtare për Kërkime mbi Kancerin, rreziku mund të reduktohet deri në 40% përmes një diete të ekuilibruar dhe aktivitetit të rregullt fizik.

Pavarësisht këtyre provave, parandalimi shpesh nënvlerësohet.

Rëndësia e diagnozës së hershme

Krahas një stili jetese të shëndetshëm, ekzaminimet parandaluese (screening) dhe kontrollet e rregullta mbeten thelbësore.

Mamografia, ekografia dhe vizitat mjekësore mundësojnë zbulimin e sëmundjes në një fazë të hershme, duke rritur kështu shkallën e mbijetesës.

Statistikat tregojnë se rreth mijëra gra janë shpëtuar falë parandalimit dhe se 85% e atyre që diagnostikohen herët janë ende gjallë pesë vjet pas diagnozës.