Franca nis hetimet për alarmet e bombave në avionë, dyshohet për përfshirjen e “fuqive të huaja”
Zyra e prokurorit të Parisit njoftoi të shtunën nisjen e një hetimi mbi kërcënimet me bomba kundër avionëve që fluturonin mbi territorin francez, konkretisht për të hetuar një lidhje të mundshme midis autorëve të krimit dhe “forcave të huaja”.
Hetimet “po kryhen për të identifikuar autorët e emaileve që përhapin këtë informacion të rremë me qëllim krijimin e përshtypjes në publik se ekziston një rrezik dhe lidhja e mundshme e këtyre autorëve me fuqitë e huaja”, tha zyra e prokurorit për AFP-në.
Të enjten, një aeroplan i Aer Lingus u devijua në Evreux pas një kërcënimi me bombë. Të premten, zyra e kryeministrit raportoi katër alarme të reja të lëshuara për avionë që fluturonin mbi territorin francez, mbi të cilët ekspertët e çaktivizimit të bombave kryen “kontrolle sigurie”.
Tre nga këto avionë u ulën në aeroportin e Orly dhe i katërti në aeroportin e Bordeaux, të gjithë në mënyrë të sigurt, sipas një burimi me njohuri për çështjen.
“Një hetim është duke u zhvilluar për të përcaktuar origjinën e këtyre kërcënimeve, të cilat prekin të gjithë Evropën”, shtoi zyra e Kryeministrit Sebastien Lecorni, përgjegjës për sigurinë dhe mbrojtjen ajrore të vendit.
Dhjetëra fluturime komerciale janë goditur nga kërcënime me bomba që nga fillimi i javës në Evropë. Aeroplanët është dashur të devijohen, të shoqërohen nga avionë luftarakë, të evakuohen ose të kontrollohen. Në asnjë nga këto incidente nuk janë gjetur pajisje shpërthyese.
Qeveria irlandeze dje denoncoi një “fushatë të mundshme të koordinuar që synonte të shkaktonte përçarje”.
Pretendimet për përgjegjësinë për kërcënimet e dërguara të enjten në aeroportet e Romës dhe Sofjes erdhën nga organizata ekstremiste ruse “Luftëtarët e Shtetit të Arsenikut”, por udhëheqësi i kësaj organizate mohoi çdo përfshirje.
Zyrtarët evropianë kanë denoncuar prej muajsh rritjen e operacioneve të destabilizimit të kryera në dobi të Rusisë ose Iranit, duke përfshirë fushatat e dezinformimit, sabotimin, sulmet kibernetike, ndër të tjera.
Shërbimet e inteligjencës kanë pritur prej javësh një përshkallëzim të këtyre fushatave, veçanërisht nga Rusia, për të ndikuar në mbështetjen evropiane për Ukrainën.
