Francë: 12 departamente nën alarm për stuhi

Shërbimi kombëtar meteorologjik i Francës, Meteo-France, ka vendosur 12 departamente në pjesën perëndimore dhe qendrore të vendit nën alarm portokalli për stuhi gjatë ditës së mërkurë.

Sipas Meteo-France, priten breshër, reshje të dendura me akumulime deri në 30 milimetra në orë, erëra me shpejtësi nga 80 deri në 100 kilometra në orë, si dhe aktivitet intensiv të rrufeve.

Autoritetet kanë paralajmëruar për një “rrezik të konsiderueshëm të fenomeneve të motit të ashpër” gjatë episodit të stuhive të së mërkurës.

Alarmi vjen pas stuhive të fuqishme që përfshinë jugun e Francës gjatë natës nga e hëna në të martë. Në departamentin Aude, një tornado shkaktoi dëme të konsiderueshme të hënën.

Sipas parashikimeve, moti i paqëndrueshëm do të vijojë edhe në ditët e ardhshme. Të enjten pritet zhvillimi i një zone me stuhi nga Masivi Qendror Jugor deri në Lorraine, ndërsa të premten në mëngjes reshjet dhe stuhitë pritet të zhvendosen drejt lindjes.

Meteo-France ka paralajmëruar gjithashtu për mundësinë e rrebesheve të shumta në një pjesë të madhe të Francës veriperëndimore.