Inspektorati i Punës ndalon punimet në tri objekte ndërtimi në Gjakovë dhe Vushtrri

Inspektorati Qendror i Punës ka ndaluar përkohësisht punimet në tri objekte ndërtimi — dy në komunën e Gjakovës dhe një në komunën e Vushtrrisë — pas parregullsive të konstatuara në zbatimin e masave për siguri dhe shëndet në punë, siç njofton Telegrafi.

Sipas njoftimit të Inspektoratit, parregullsitë janë evidentuar gjatë inspektimeve në terren. Për shkak të rrezikut për sigurinë dhe shëndetin e punëtorëve, është vendosur ndalimi i përkohshëm i punimeve në të tria objektet, deri në përmbushjen e kërkesave dhe zbatimin e masave të nevojshme të sigurisë.

Punimet do të mund të rifillojnë vetëm pasi punëdhënësit t’i eliminojnë mangësitë e evidentuara dhe të krijojnë kushte të sigurta për zhvillimin e punës në këto objekte.

Inspektorati Qendror i Punës u ka bërë thirrje punëdhënësve që të respektojnë legjislacionin në fuqi për sigurinë dhe shëndetin në punë, si dhe të marrin të gjitha masat e nevojshme për parandalimin e aksidenteve në vendin e punës.