Meta rendit propozimet për reformën zgjedhore: lista 100% të hapura, balotazh dhe rikthim te Kushtetuta e para vitit 2008
Ish-presidenti Ilir Meta, në një mesazh të shpërndarë në rrjetet sociale, ka paraqitur një sërë propozimesh për reformën zgjedhore, duke thënë se zgjedhjet në Shqipëri kanë nevojë për një reformë të thellë zgjedhore, siç njofton Shqiptarja.com. Sipas tij, reforma zgjedhore është çështje themelore për të ardhmen e demokracisë në vend dhe propozimet synojnë një proces zgjedhor më të drejtë e më transparent.
Sipas Metës, ndryshimet e vitit 2008 sollën përqendrim të pushtetit në duart e kryetarëve të partive, duke i privuar zgjedhësit nga mundësia për të zgjedhur lirisht përfaqësuesit e tyre. Për këtë arsye, ai propozon rikthim te Kushtetuta e para ndryshimeve të vitit 2008, me lista 100% të hapura për zgjedhjen e deputetëve dhe të këshilltarëve bashkiakë, si dhe rikthim të balotazhit për zgjedhjen e kryebashkiakëve. Njëkohësisht, ai kërkon shfuqizimin e Kodit Zgjedhor aktual.
Një tjetër pikë qendrore e propozimeve të Metës është garantimi i së drejtës së votës për çdo qytetar, në Shqipëri dhe jashtë saj, me të drejta të plota për diasporën. Kjo përfshin votimin në ambasada e konsullata, votimin me postë, votimin elektronik dhe pjesëmarrjen e deputetëve të diasporës në Kuvend. Ai kërkon gjithashtu zbatimin e plotë të rekomandimeve të ODIHR-it, Komisionit të Venecias dhe organizatave ndërkombëtare të monitorimit të zgjedhjeve.
Meta propozon gjithashtu zgjedhjen e Presidentit të Republikës nga populli, uljen e numrit të deputetëve në Kuvend dhe ngritjen e standardit të përfaqësimit e të llogaridhënies ndaj zgjedhësve, si dhe kufizimin e mandateve në dy mandate radhazi, për të parandaluar krijimin e një qeverisjeje të përhershme.
Meta thekson se në thelb të propozimeve qëndron shmangia e asaj që ai e quan kapje e demokracisë nga pushteti, me synim rikthimin e besimit të zgjedhësve dhe barazisë në garën politike. “Zgjedhorja nuk është çështje teknike, por themeli i demokracisë. Pa zgjedhje të lira, të ndershme dhe të barabarta, nuk ka shtet ligjor”, shprehet ai.
