E premte, 20 Nëntor 2026
54°F Detroit
Ballina›Arte›“Një komb, një ABC”, ekspozita e Arkivit të Shtetit mbi historinë e alfabetit shqip

“Një komb, një ABC”, ekspozita e Arkivit të Shtetit mbi historinë e alfabetit shqip

Drejtoria e Përgjithshme e Arkivave në bashkëpunim me Agjencinë e Parqeve dhe Rekreacionit prezantoi ekspozitën dokumentare dhe fotografike “Një komb, një ABC”.

Ekspozita vjen në prag të Ditës së Alfabetit. Dokumentet e vendimeve të marra nga Komisioni për Çështjen e Alfabetit, fotot e delegatëve në Kongresin e Manastirit, si edhe kujtimet e pjesëmarrëses së vetme grua, Parashqevi Qiriazit, u ekspozuan pranë instalacionit “Tirana Moons”, në kryeqytet.

Aktiviteti u mundësoi të pranishmëve njohjen me gjurmët historike të ruajtura në arkiva, të cilat ilustrojnë përpjekjet për njehsimin e alfabetit të gjuhës shqipe. Mes dokumenteve të ekspozuara bënin pjesë procesverbale të mbledhjes V dhe VI të Komisionit për Çështjen e Alfabetit të Gjuhës Shqipe, rregullat mbi ortografinë e gjuhës shqipe të miratuara nga Komisia Letrare dhe të tjera materiale të Arkivit Qendror Shtetëror (AQSH), që nxjerrin në pah këtë faqe të historisë së kombit.

Drejtoria e Përgjithshme e Arkivave tha se, në këtë nëntor festash, në Muzeun Arkivor do të ketë një ekspozitë të përbashkët mbi Kongresin e Manastirit (1908) dhe shpalljen e Pavarësisë, e cila dëshmon mbi vendimet e Komisionit të Alfabetit, si edhe 28 nëntorin 1912 në Vlorë dhe në mbarë Shqipërinë.

Lini një koment