Notat e lojtarëve, Kosovë 0-0 Izrael: Krasniqi më i miri te Dardanët, Peretz lojtari i ndeshjes
Siç raporton Telegrafi, Kosova e mbylli pa gola përballjen me Izraelin në Prishtinë, në një ndeshje ku Dardanët dominuan në fillim, por nuk arritën ta konkretizojnë epërsinë e tyre.
Skuadra e Kosovës e nisi takimin me iniciativë, duke kontrolluar posedimin e topit dhe duke krijuar më shumë raste se mysafirët, por mungesa e saktësisë para portës e la rezultatin të pandryshuar deri në pushim.
Në pjesën e dytë, loja u bë më e vështirë për vendasit pas përjashtimit të Veldin Hoxhës, i cili u ndëshkua me kartonin e dytë të verdhë dhe la ekipin me dhjetë lojtarë. Pavarësisht kësaj, Kosova arriti ta ruajë barazimin deri në fund.
Me pikën e fituar, Kosova shkon në kuotën e gjashtë pikëve dhe renditet e dyta në grup, me një ndeshje më shumë se Irlanda dhe Austria, të cilat përballen në mbrëmje.
Sipas notave të Sofascore që publikon Telegrafi, lojtari më i mirë te Kosova ishte Ilir Krasniqi, i vlerësuar me 7.6. Paraqitje pozitive patën edhe Amir Saipi me 7.3, Kreshnik Hajrizi me 7.1 dhe Edon Zhegrova me 7.0.
Në anën tjetër, më i dobëti te Dardanët doli Veldin Hoxha me 6.2, pas kartonit të kuq, ndërsa lojtari i ndeshjes u shpall portieri mysafir Daniel Peretz me 7.8, falë disa pritjeve vendimtare që e mbajtën Izraelin në lojë.
