Operacion ndërkombëtar godet rrugën transatlantike të trafikut të kokainës
Në një mision ndërkombëtar policor u ndërpre një rrugë e rëndësishme e trafikut të kokainës në Atlantik, me konfiskimin e mbi 12 tonëve kokainë dhe rreth 9.5 tonëve hashash. Operacioni, i zhvilluar nga 13 deri më 26 prill, rezultoi në ndalimin e tetë anijeve dhe arrestimin e 54 personave.
Operacioni u koordinua nga Europol dhe synonte goditjen e rrjeteve të trafikut që përdorin transferime komplekse në det për të shmangur portet e mëdha, raporton CBS News. Forcat e zbatimit të ligjit u vendosën në pika të ndryshme të Atlantikut, me fokus në zonën midis Ishujve Kanarie dhe Azoreve, për të zbuluar, ndjekur dhe ndaluar anijet e dyshimta gjatë dy javëve të operacionit.
Europol e përshkroi taktiken si përdorim të “rutave detare të fragmentuara”, ku dërgesat ndahen në faza të shumta për të shpërndarë rrezikun dhe për të vështirësuar zbulimin. Sipas agjencisë, inteligjenca e mbledhur gjatë operacionit dha një kuptim më të mirë të mënyrës së funksionimit të këtyre rrjeteve dhe konfirmoi tendencën që trafikantët po zhvendosin aktivitetin në det për të shmangur kontrollin në portet kryesore.
Jean-Philippe Lecouffe, zv/drejtori ekzekutiv i Europol për operacionet, tha se rrjetet kriminale po bëhen më fleksibile dhe më të lidhura ndërkombëtarisht, ndërsa përgjigjja e autoriteteve po përshtatet me ritëm të shpejtë. Europol njoftoi se do të përdorë inteligjencën e re për të identifikuar dhe shkatërruar rrjetet pas këtyre operacioneve transatlantike, raporton sërish CBS News.
