Përplasje në komision: Bajrami e pyet Shabanin për partinë, ai përgjigjet se është krenar që i përket PDK-së
Raportimi i Këshillit të Pavarur Mbikëqyrës për Shërbimin Civil të Kosovës (KPMShCK) në Komisionin për Administratë Publike, Digjitalizim, Pushtet Lokal, Media dhe Zhvillim Rajonal u shoqërua të martën me përplasje verbale dhe akuza për ndikim politik, siç raporton Ekonomia Online.
Deputeti i Lëvizjes Vetëvendosje, Alban Bajrami, tha se raportimi i Këshillit në komision është dashur të bëhet më herët, duke theksuar se KPMShCK-ja nuk ka raportuar që nga viti 2023, ndonëse raportimi i rregullt bëhet një herë në vit. «Imagjinoje, ju jeni tu ekzistu një botë paralele», tha Bajrami, sipas raportimit të Ekonomia Online.
Ndaj tij reagoi deputetja e Aleancës, Albana Bytyqi, e cila tha se «po s’kemi që dy vjet Qeveri, s’keni qenë më herët». Bajrami iu përgjigj se partia e saj ka kërkuar vazhdimisht zgjedhje, ndërsa Bytyqi e pyeti: «A nuk i kishim zgjedhje?».
Më pas Bajrami iu drejtua anëtarit të KPMShCK-së, Eshref Shabani, duke i thënë se sjellja e tij nuk ishte korrekte dhe kishte ngjyrosje politike, dhe e pyeti drejtpërdrejt: «A po na kallxon në cilën parti politike je?».
Në përgjigjen e tij, Shabani tha se nuk është në dorë të Qeverisë, pasi është zgjedhur nga Kuvendi i Kosovës me 55 vota dhe është anëtar i Këshillit prej gjashtë vjetësh. Ai përmendi se e ka provuar edhe shkarkimin nga Kuvendi, i cili më pas ka dalë kundërkushtetues, dhe se vendimet e Këshillit mund të kontestohen në gjykatë. «Jam shumë krenar që jam me PDK-në dhe jam shumë krenar që puna që e kam bërë në Këshill juve, deputetëve të VV-së, nuk ju pëlqen», u shpreh Shabani.
