Shpërthimi në apartamentin në Elbasan, vijojnë kërkimet për 69-vjeçarin e pagjetur! Policia jep detaje
Ende po vijojnë kërkimet për gjetjen e një 69-vjeçari që rezulton ende i pagjetur pas shpërthimit të regjistruar pasditen e kësaj të mërkure në një apartament në Elbasan. Për shkak të shpërthimit të fortë edhe banesat e tjera kanë marrë dëmtime ku mësohet se janë shembur edhe muret.
Fatkeqësisht, nga kjo ngjarje ka humbur jetën një e moshuar teksa 10 persona të tjerë kanë mbetur të lënduar. Një zonjë për Euronews Albania bën me dije se nga shpërthimi dhe zjarri i janë djegur të gjitha gjërat në banesë.
“Pafund, i kam patur të gjitha brenda dhe u dogjën e u bënë shkrumb”, tha një banore të cilës iu dëmtua banesa nga shpërthimi.
Nga raportimet e para. shkak i shpërthimit dyshohet një bombol gazi. Policia në njoftimin zyrtar ka bërë me dije se rrethanat janë ende të paqarta dhe se po punon për zbardhjen e plotë të ngjarjes.
“Elbasan/Informacion paraprak. Rreth orës 14:45, në rrethana ende të paqarta, ka rënë zjarr në banesën e shtetasit H. I., në katin e tretë të një pallati në lagjen “Qemal Stafa”.
Si pasojë, ka humbur jetën, banorja në të njëjtin pallat, shtetasja H. B., 82 vjeçe, si dhe janë dëmtuar 10 banorë të tjerë, të cilët janë në kujdesin e mjekëve.
Grupi hetimor është në vendngjarje dhe po kryen veprimet për sqarimin dhe dokumentimin e rrethanave të rastit.
