Sondazhi Reuters/Ipsos: miratimi i Trump në minimum rekord, votuesit hispanikë largohen nga republikanët
Miratimi i presidentit Donald Trump qëndron në nivelin më të ulët të karrierës së tij politike, ndërsa votuesit hispanikë po largohen masivisht nga ai dhe Partia Republikane një muaj para zgjedhjeve të mesmandatit, sipas sondazhit të ri Reuters/Ipsos të përfunduar të hënën.
Sondazhi gjashtëditor, i kryer online në shkallë kombëtare me 4,506 të rritur amerikanë dhe me marzh gabimi rreth dy pikë përqindjeje, tregon se vetëm 32% e amerikanëve e miratojnë presidencën e Trump — i pandryshuar nga sondazhi i shtatorit që shënoi nivelin më të ulët të karrierës së tij, sipas Reuters.
Rënia është më e thellë te votuesit hispanikë, të cilët e ndihmuan Trumpin të fitonte në 2024 me gati gjysmën e votave të tyre, krahasuar me rreth një të tretën në 2020. Vetëm 24% e hispanikëve e miratojnë punën e tij në Shtëpinë e Bardhë — niveli më i ulët në të dy mandatet e tij.
Një shenjë se popullariteti i ulët po rëndon mbi partinë e tij: vetëm 26% e votuesve hispanikë të regjistruar planifikojnë të votojnë për republikanët në zgjedhjet e 3 nëntorit, të cilat do të përcaktojnë kontrollin e të dy dhomave të Kongresit. Rreth 52% planifikojnë të votojnë për demokratët — dyfishi i mbështetjes për republikanët dhe avantazhi më i madh demokrat që kur Trump mori detyrën.
Mbështetja e hispanikëve për presidentin është zbehur muajt e fundit, ndërsa amerikanët përballen me inflacion të lartë të shkaktuar nga vendimi i Trump për të hyrë në luftë me Iranin, shkruan Reuters.
