Theret me mjet të mprehtë një i mitur në Pejë, arrestohet bashkëmoshatari i dyshuar
Një i mitur ka pësuar lëndime trupore si pasojë e një sulmi me mjet të mprehtë, që ndodhi pasditen e së dielës në rrugën “Onufri” në Pejë, siç njofton Telegrafi. I dyshuari, po ashtu i mitur, është arrestuar nga Policia e Kosovës.
Zëdhënësi i Policisë për Rajonin e Pejës, Sheremet Elezaj, ka konfirmuar për Telegrafin se rasti ka ndodhur rreth orës 15:50. Sipas tij, policia është njoftuar nga emergjenca e spitalit, pasi viktima ishte dërguar aty për trajtim mjekësor për shkak të një plage që dyshohet se ishte shkaktuar nga një mjet i mprehtë.
“Njësitet e nevojshme policore menjëherë i janë përgjigjur rastit dhe, sipas hetimeve fillestare, dyshohet se viktima, mashkull i mitur, është sulmuar me mjet të mprehtë nga një person tjetër, po ashtu mashkull i mitur, në rrugën ‘Onufri’ në Pejë. I dyshuari është arrestuar”, ka thënë Elezaj, sipas raportimit të Telegrafit, raportim të cilin e ka konfirmuar me të njëjtën deklaratë edhe “Betimi për Drejtësi”.
Policia, në koordinim me institucionet përkatëse, po ndërmerr veprimet e nevojshme hetimore për zbardhjen e plotë të rrethanave të rastit. Deri tani nuk është bërë e ditur gjendja shëndetësore e viktimës, as motivi i sulmit.
