Trump kërcënon Meksikën: Do dyfishoj tarifat nëse nuk ndalon karvanët e emigrantëve
Presidenti amerikan, Donald Trump, ka kërcënuar se do të dyfishojë menjëherë tarifat tregtare ndaj Meksikës, nëse autoritetet e këtij vendi nuk ndalojnë atë që ai e cilësoi si karvanë të mëdhenj emigrantësh që po përparojnë drejt kufirit jugor të Shteteve të Bashkuara.
Përmes një postimi në platformën e tij Truth Social, Trump i bëri thirrje qeverisë meksikane të ndërhyjë menjëherë, duke paralajmëruar masa të ashpra ekonomike në rast të mosveprimit.
“Meksika duhet t’i ndalojë ata tani, dhe nëse nuk e bëjnë këtë, tarifat ndaj Meksikës do të dyfishohen menjëherë. Nuk do të ketë asnjë lehtësim!”, shkroi presidenti amerikan.
Trump pretendoi se karvanë të mëdhenj emigrantësh po organizohen dhe kanë nisur një marshim të paligjshëm përmes territorit meksikan, me synimin për të hyrë në SHBA. Ai akuzoi gjithashtu vende të huaja se po dërgojnë drejt territorit amerikan individë që, sipas tij, nuk duhet të lejohen të hyjnë në vend.
Në deklaratën e tij, kreu i Shtëpisë së Bardhë e lidhi situatën në kufirin jugor edhe me zhvillimet politike pas zgjedhjeve të mesmandatit të së martës, ku demokratët fituan shumicën në të dy dhomat e Kongresit dhe morën poste të rëndësishme guvernatorësh.
Sipas Trump, kjo situatë ka nxitur rifillimin e asaj që ai e cilësoi si një “pushtim” të SHBA-së, duke pretenduar se lëvizjet e emigrantëve lidhen me atë që ai e përshkroi si humbje të perceptuar të republikanëve.
Presidenti amerikan bëri të ditur se për paralajmërimin e tij janë në dijeni autoritetet meksikane, Patrulla Kufitare e SHBA-së dhe Shërbimi i Emigracionit dhe Doganave (ICE), institucioni federal përgjegjës për zbatimin e ligjeve të emigracionit dhe deportimet.
Trump iu drejtua gjithashtu udhëheqjes së Teksasit, duke përmendur guvernatoren e ardhshme demokrate të shtetit, Gina Hinojosa, e cila mposhti guvernatorin aktual republikan Greg Abbott.
Deri më tani, qeveria meksikane nuk ka reaguar zyrtarisht ndaj kërcënimit të presidentit amerikan për dyfishimin e tarifave, ndërsa nuk ka dhënë asnjë koment lidhur me pretendimet për lëvizjen e karvanëve të emigrantëve drejt kufirit amerikan.
