Wednesday, 23 September 2026
Lajmet e fundit
Departamenti i Drejtësisë mbështet ndalimin e gazetarëve të Shtëpisë së Bardhë nga Trump, duke përmendur sigurimin e informacionit dhe standardet profesionale • Gruaja e një studiuesi amerikan të ndaluar padrejtësisht në Kinë i kërkon Trumpit të shtyjë për lirimin e tij te Xi Jinping • Sondazhi i Fed-it: drejtuesit financiarë presin inflacion më të lartë, shqetësimi kryesor — normat e interesit • Beteja për hartën zgjedhore të Misurit kthehet në Gjykatën e Lartë — apeli i tretë emergjent në javë • Katër gjëra që çdo grua duhet të dijë për dendësinë e kockave • Rendimentet e bonove të Thesarit amerikan në nivele rekord, ndërsa tregjet presin rritje të re të normave të Fed-it • CNN, MS NOW dhe Politico i kërkojnë gjyqtarit të rivendosë menjëherë qasjen në Shtëpinë e Bardhë • Një mur i lashtë nën një hotel në Paris mund të vërtetojë origjinën historike të qytetit • Një udhëheqëse e opozitës së Venezuelës, María Corina Machado, pengohet të hyjë në vend tri herë brenda 24 orësh • Ku takohen shqiptarët e Michiganit: xhamitë, kishat, teqeja dhe shkollat e së shtunës që mbajnë gjallë komunitetin •
54°F Detroit
Ballina›Bota›IZRAEL – Netanyahu kritikon Macron për deklaratat mbi situatën në Bregun Perëndimor
Bota

IZRAEL – Netanyahu kritikon Macron për deklaratat mbi situatën në Bregun Perëndimor

TEL AVIV, 23 shtator /ATSH-DPA/- Kryeministri izraelit Benjamin Netanyahu ka kritikuar presidentin francez Emmanuel Macron për deklaratat e tij në Asamblenë e Përgjithshme të OKB-së lidhur me situatën në Bregun Perëndimor.

Duke folur në Debatin e Përgjithshëm vjetor të OKB-së, Macron tha se Izraeli po kryen shkelje të përditshme në territorin e pushtuar, pavarësisht faktit se Hamasi nuk kishte mbizotëruar kurrë në Bregun Perëndimor, ndryshe nga Gaza.

“Shikoni se çfarë po ndodh në Bregun Perëndimor, ditë pas dite, ne shohim shkelje. Dhe në emër të kujt? Hamasi nuk ka vepruar kurrë në Bregun Perëndimor. Ajo që po ndodh atje, çdo ditë, po e bën gjithnjë e më të pamundur realizimin e një projekti, që duhet të bazohet në respektimin e të drejtës legjitime të popullit palestinez për të ekzistuar”, tha dje Macron në fjalimin e tij në Asamblenë e Përgjithshme të OKB-së, në Nju Jork.

“Çfarë vlere ka besueshmëria jonë nëse vazhdojmë të qëndrojmë pasivë përballë Gazës? Disa pretendojnë se është arritur paqja. Por, kjo paqe nuk ka hapur asnjëherë aksesin për ndihmat humanitare. A duhet thjesht të qëndrojmë dhe të shohim këtë spektakël që duhet të na turpërojë të gjithëve?”, tha presidenti francez duke iu referuar Gazës.

Zyra e Netanyahut e cilësoi deklaratën e Macron si “absurde”, duke thënë se anëtarë të Hamasit kanë vrarë civilë izraelitë në Bregun Perëndimor.

Edhe ish-shefi i ushtrisë izraelite, Gadi Eisenkot, një nga rivalët kryesorë politikë të Netanyahut, e kritikoi Macron.

Ai tha se Izraeli ka luftuar prej vitesh kundër sulmeve të armatosura në Bregun Perëndimor.

Një diplomat francez, i cituar nga “The Times of Israel”, sqaroi se Macron nuk kishte thënë se Hamasi nuk ka vepruar në Bregun Perëndimor. Ai donte të theksonte se Hamasi “nuk e qeveris Bregun Perëndimor”.

Situata në Bregun Perëndimor është përkeqësuar ndjeshëm që nga sulmi i Hamasit ndaj Izraelit më 7 tetor 2023 dhe fillimi i luftës në Gaza.

Kohët e fundit, ka pasur si sulme nga palestinezë ndaj izraelitëve, ashtu edhe një rritje të dhunës së kolonëve izraelitë ndaj palestinezëve.

Ushtria izraelite është kritikuar se nuk ka ndërhyrë mjaftueshëm kundër këtyre sulmeve./

Lini një koment

● Artikuj të ngjashëm