Mbi 2 mln euro në ditë, Kosova importoi 205 mln euro energji për 10 muaj të këtij viti
Për vetëm shtatë ditë, blerja e energjisë elektrike i kushtoi Kosovës 14.9 milionë euro, ndërsa nga janari deri në tetor importi i energjisë ka arritur mbi 205 milionë euro.
Kosova ka shpenzuar miliona euro për blerjen e energjisë elektrike, me shifra që arrijnë në nivele të larta brenda një dite, një jave dhe përgjatë dhjetë muajve të parë të vitit 2026.
Vetëm për periudhën 28 tetor – 3 nëntor, shpenzimet për blerjen e energjisë elektrike kanë arritur në 14 milionë e 915 mijë e 923 euro e 88 centë.
Kjo nënkupton se për shtatë ditë, mesatarisht janë shpenzuar mbi 2.1 milionë euro në ditë për blerjen e rrymës.
Shpenzimi më i lartë ditor në këtë periudhë është regjistruar më 28 tetor, kur blerja e energjisë elektrike ka kushtuar 2 milionë e 385 mijë e 449 euro. Një ditë më pas, më 29 tetor, janë shpenzuar 2 milionë e 373 mijë e 489 euro.
Më 30 tetor, kostoja e blerjes së energjisë ka qenë 2 milionë e 127 mijë e 378 euro, ndërsa më 31 tetor janë paguar 2 milionë e 349 mijë e 582 euro.
Më 1 nëntor shpenzimet kanë rënë në 1 milion e 215 mijë e 816 euro, por kjo rënie ka qenë e përkohshme. Më 2 nëntor, blerja e energjisë ka kushtuar 2 milionë e 300 mijë e 679 euro, ndërsa më 3 nëntor edhe 2 milionë e 163 mijë e 528 euro.
Sipas të dhënave të Doganës së Kosovës, importi i energjisë elektrike gjatë periudhës janar–tetor 2026 ka arritur vlerën prej 205 milionë e 340 mijë e 697 euro e 78 centë.
Kjo shumë përfaqëson vlerën e importit të energjisë elektrike për dhjetë muaj, me shpenzime që kanë ndryshuar nga muaji në muaj.
Muaji janar ka regjistruar vlerën më të lartë të importit, me 35 milionë e 806 mijë e 685 euro. Në shkurt, importi ka kushtuar 21 milionë e 81 mijë e 77 euro, ndërsa në mars vlera ka qenë 16 milionë e 689 mijë e 268 euro.
Në prill, Kosova ka importuar energji elektrike në vlerë prej 16 milionë e 866 mijë e 538 euro, kurse në maj shpenzimet kanë arritur në 15 milionë e 710 mijë e 488 euro.
Gjatë qershorit, vlera e importit është rritur në 21 milionë e 865 mijë e 528 euro, ndërsa korriku ka shënuar nivelin më të ulët të importit gjatë këtij viti, me 9 milionë e 230 mijë e 499 euro.
Në gusht, importi ka kushtuar 17 milionë e 200 mijë e 673 euro, ndërsa në shtator është regjistruar një rritje e konsiderueshme, me 27 milionë e 691 mijë e 244 euro.
Për muajin tetor, vlera e importit të energjisë elektrike ka arritur në 23 milionë e 198 mijë e 693 euro.
Deputetja e Lidhjes Demokratike të Kosovës (LDK), Janina Ymeri, ka reaguar lidhur me shpenzimet për energjinë elektrike, duke vënë në pah koston prej 27.6 milionë eurosh për muajin shtator.
“30 Ditë Shtatori, 27.6 Milionë Euro kosto e rrymës. Era Mafi Energjetike!”, ka shkruar Ymeri në një reagim publik.
Ymeri, e cila vazhdimisht ka kritikuar menaxhimin e sektorit energjetik nga Qeveria, ka ngritur shqetësime për shpenzimet e importit të energjisë elektrike, tregtimin e rrymës dhe transparencën në marrëveshjet energjetike.
Në reagimet e saj të mëhershme, ajo ka përdorur edhe termin “mafia energjetike”, për të përshkruar atë që e konsideron si një rrjet interesash në sektorin e energjisë elektrike.
Kurse, ASK ka treguar në publikimin e fundit se gjatë muajit gusht 2026, konsumi i energjisë elektrike në Kosovë ka arritur në 453.38 GWh, duke shënuar rritje prej 17.95 për qind krahasuar me të njëjtin muaj të vitit paraprak.
Sipas të dhënave të ASK-së, energjia elektrike bruto në dispozicion ishte 544.61 GWh, apo 8.46 për qind më shumë se në gushtin e vitit 2025.
Gjatë kësaj periudhe, importi i energjisë elektrike arriti në 400.82 GWh, ndërsa eksporti ishte 311.21 GWh, ku në këtë shifër përfshihet edhe sasia e transmisionit.
ASK ka bërë të ditur se pjesëmarrja e energjisë elektrike alternative në konsumin e përgjithshëm ishte 7.42 për qind. Ndërkohë, prodhimi bruto i energjisë elektrike nga hidrocentralet arriti në 7.47 GWh, me rritje prej 33.24 për qind krahasuar me gushtin e vitit paraprak.
Në anën tjetër, prodhimi i thëngjillit gjatë gushtit ishte 477.562 mijë tonë, duke shënuar rënie prej 3.65 për qind në krahasim me të njëjtën periudhë të vitit 2025.
