PACE: Zgjedhjet e 7 qershorit në Kosovë u zhvilluan të qeta, por me sfida strukturore
“Zgjedhjet e parakohshme parlamentare të 7 qershorit 2026 në Kosovë u zhvilluan në një atmosferë të qetë, të rregullt dhe profesionale, pa incidente të mëdha”, thuhet në raportin e vëzhgimit të zgjedhjeve të Asamblesë Parlamentare të Këshillit të Evropës (PACE), të prezantuar sot në seancën e shtatorit të Asamblesë nga raportuesi Iulian Bulai (Rumani, ALDE), siç njoftoi faqja zyrtare pace.coe.int.
Sipas raportit, “Komisioni Qendror i Zgjedhjeve administroi zgjedhjet në mënyrë efektive, mekanizmat e zgjidhjes së ankesave zgjedhore funksionuan mirë dhe votuesit arritën ta ushtronin të drejtën e tyre të votës lirisht”. Delegacioni i PACE-së “përgëzon popullin e Kosovës për angazhimin e tij të vazhdueshëm për demokraci në rrethana të vështira”.
Në të njëjtën kohë, zgjedhjet “zbuluan sfida strukturore të vazhdueshme”, përfshirë “fushë-lojë të pabarabartë që rezultoi nga keqpërdorimi i burimeve administrative nga qeveria në detyrë; lodhjen e votuesve dhe pjesëmarrjen në rënie; një fushatë pa debat të mirëfilltë politikash dhe pa debate direkte mes kandidatëve kryesorë; kërcënimet në rritje nga dezinformimi i gjeneruar nga inteligjenca artificiale, gjuha e urrejtjes dhe dhuna digjitale”, ndërsa “gratë në jetën publike u nënshtruan gjithnjë e më shumë dhunës digjitale, përfshirë manipulimin e imazheve, deepfake-et, shantazhin dhe gjuhën seksiste”.
Delegacioni i kujton Kuvendit se Presidenti i vendit duhet të zgjidhet deri më 6 tetor për të shmangur një tjetër shpërndarje, duke theksuar se “sfida kryesore nuk është vetëm të organizohen zgjedhje të besueshme, por edhe të sigurohet që rezultatet të prodhojnë institucione funksionale”. Paralajmërimi është se “vazhdimi i vakumit institucional dhe i zgjedhjeve të njëpasnjëshme dëmton qeverisjen demokratike, besimin publik dhe aspiratat euro-atlantike të Kosovës”.
“Vetëm zgjedhjet nuk mund ta zgjidhin një ngërç më të thellë politik. Zgjedhjet e përsëritura mund ta riprodhojnë të njëjtin bilanc të forcave, përveç nëse partitë bëhen më të gatshme të negociojnë, të bëjnë kompromise dhe të formojnë koalicione stabile”, thuhet në raportin e PACE-së.
(Në raport, PACE sqaron se të gjitha referencat për Kosovën në këtë tekst kuptohen në përputhje të plotë me Rezolutën 1244 të Këshillit të Sigurimit të OKB-së dhe pa paragjykimin e statusit të Kosovës.)
