SHBA – Rrethohet Shtëpia e Bardhë, raportohen dy incidente sigurie, ndërsa Trump ndodhej në rezidencë

– Shërbimi Sekret amerikan arrestoi sot dy persona pranë Shtëpisë së Bardhë, pas dy incidenteve të ndara të sigurisë, ndërsa presidenti Donald Trump ndodhej brenda rezidencës presidenciale, sipas “Reuters”.

Sipas Shërbimit Sekret, një person drejtoi automjetin e tij mbi trotuarin pranë parkut Lafayette, përballë kompleksit presidencial, ndërsa një tjetër kapërceu një barrierë sigurie në të njëjtën zonë.

Pas incidenteve, Shtëpia e Bardhë u vendos përkohësisht në gjendje izolimi sigurie, ndërsa autoritetet mbyllën edhe rrugët përreth parkut.

Ngjarja e parë u regjistrua para orës 10:00 të mëngjesit, kur një automjet u ngjit mbi trotuarin që rrethon parkun Lafayette.

Sipas një deklarate të një zëdhënësi të Shërbimit Sekret, drejtuesi i automjetit shfaqi rezistencë ndaj forcave të rendit, por u arrestua menjëherë.

“Drejtuesi i automjetit u përplas me forcat e rendit, por u vu shpejt në pranga”, thuhej në deklaratë.

Pothuajse në të njëjtën kohë, një person i dytë kapërceu një barrierë sigurie pranë këndit veriperëndimor të parkut Lafayette. Edhe ky person u ndalua menjëherë nga agjentët e Shërbimit Sekret.

Autoritetet nuk kanë bërë të ditur nëse dy incidentet kanë lidhje me njëri-tjetrin.

Të dyja ngjarjet janë nën hetim, ndërsa autoritetet po përpiqen të përcaktojnë rrethanat dhe motivet e personave të arrestuar.

Presidenti Donald Trump ndodhej në Shtëpinë e Bardhë në momentin e incidenteve.

Për arsye sigurie, kompleksi presidencial u vendos për një periudhë të shkurtër në izolim, ndërsa u kufizua qarkullimi i automjeteve dhe këmbësorëve në zonën përreth.

Parku Lafayette ndodhet përballë Shtëpisë së Bardhë dhe është një nga hapësirat publike më pranë rezidencës presidenciale amerikane. /