Shtohen paraqitjet në spitalin e Vlorës me shenja helmimi, në dy mostra të ujit konstatohet mungesë klori
Shtohen rastet e paraqitjes në urgjencën e Spitalit Rajonal të Vlorës me simptoma helmimi; siç njofton Shqiptarja.com, dyshohet se shkaku është uji i pijshëm në lagjet “10 Korriku” dhe “Hajro Çakërri”, pas një ndërhyrjeje riparimi në rrjetin e ujësjellësit dhe rikthimit të furnizimit në këto zona.
Në 24 orët e fundit janë paraqitur 42 qytetarë me shenja helmimi nga uji; disa kanë marrë trajtimin mjekësor dhe janë larguar, një pjesë vijon në monitorimin e mjekëve.
Grupi i punës i Drejtorisë Rajonale të Operatorit të Kujdesit Shëndetësor Vlorë, në bashkëpunim me Inspektoratin Shtetëror Shëndetësor, mori mostra të ujit të pijshëm në të dyja lagjet; në dy prej mostrave u konstatua mungesë klori.
Janë dhënë rekomandimet për njësitë e vetëqeverisjes vendore dhe Ujësjellës Kanalizime Vlorë që të marrin masa të menjëhershme.
Edhe një ditë më parë, më 8 nëntor, në spitalin e Vlorës ishin paraqitur 8 qytetarë, 6 prej tyre fëmijë, me shenja helmimi nga uji, disa nga lagjja “10 Korriku”.
