E shtunë, 21 Nëntor 2026
54°F Detroit
Ballina›Bota›Spanja do të zgjasë taksën bankare deri në 2027, Sánchez: 1.4 miliardë euro do të shkojnë për strehimin

Spanja do të zgjasë taksën bankare deri në 2027, Sánchez: 1.4 miliardë euro do të shkojnë për strehimin

Qeveria spanjolle do të miratojë në mbledhjen e kabinetit të së martës zgjatjen e taksës bankare deri në vitin 2027, njoftoi të shtunën kryeministri Pedro Sánchez, duke e lidhur masën drejtpërdrejt me financimin e politikave të strehimit, siç njofton Reuters.

“Do të zgjasim taksën bankare dhe të ardhurat do të shkojnë për politikat e strehimit”, tha Sánchez në një intervistë për radion spanjolle Onda Cero. Sipas tij, taksa do të sjellë 1.4 miliardë euro, të cilat do të ndahen tërësisht për ndërtimin e banesave sociale, për nxitje tatimore për qiramarrësit dhe për rinovimin e banesave ekzistuese.

Njoftimi vjen tetë ditë para zgjedhjeve të parakohshme të 29 nëntorit, të cilat Sánchez i shpalli muajin e kaluar me synimin për të shfrytëzuar vrullin e protestave masive për strehimin në vend. Sondazhet e vendosin Partinë Popullore konservatore përpara socialistëve të Sánchez-it, por tregojnë se asaj do t’i duhej me gjasë një aleancë me partinë e ekstremit të djathtë Vox për të qeverisur.

Taksa bankare u miratua fillimisht si një tatim i jashtëzakonshëm mbi fitimet e bankave, ndërsa në dhjetor 2024 qeveria miratoi zgjatjen e saj trevjeçare për të ndihmuar qytetarët të përballonin koston më të lartë të jetesës. Ajo varion nga 1 deri në 7 për qind të të ardhurave neto nga interesat dhe komisionet e bankave, në varësi të vëllimit të kreditimit, duke zëvendësuar normën e mëparshme fikse prej 4.8 për qind.

Norma maksimale prej 7 për qind vlen për bankat me vëllim vjetor mbi 5 miliardë euro dhe prek kryesisht tri institucionet më të mëdha të vendit, Santander, BBVA dhe CaixaBank.

Lini një koment