Sufllaqja me 1 euro shkakton kaos në Dortmund, turma sulmon policinë me gurë dhe fishekzjarre

Një ofertë prej vetëm 1 euroje për një sufllaqe u kthye në kaos në qendër të Dortmundit të Gjermanisë, të shtunën, siç njofton Shqiptarja.com. Pronari i një lokali të sapohapur kishte vendosur çmimin simbolik për hapjen, por qindra njerëz u dyndën te lokali për të përfituar nga çmimi i ulët dhe situata doli shpejt jashtë kontrollit.

Sipas njoftimit, një grup, kryesisht të mitur, tentoi të hynte me forcë në lokal. Përplasja u përshkallëzua me policinë, e cila ndërhyri me rreth 100 efektivë dhe me ndihmën e një helikopteri, ndërsa u raportuan edhe arrestime.

Turma sulmoi forcat e rendit me gurë, shishe, fishekzjarre dhe shkopinj, ndërsa policia u përgjigj me sprej piper dhe gaz lotsjellës. Disa persona u panë me thika, por, sipas të njëjtit njoftim, nuk u raportuan të lënduar dhe policia po heton incidentin.

Zëdhënësi i policisë së Dortmundit, Frank Senger, tha se incidenti i ka tronditur dhe se policia do të vijojë praninë në zonë për të garantuar sigurinë.