Publikohet audio e VAR-it për kartonin e kuq të Viniciusit, ja çfarë i thanë gjyqtarit gjatë rishikimit të pamjeve
Federata ka bërë publike audion e komunikimit mes arbitrave të VAR-it dhe gjyqtarit kryesor, Isidro Díaz de Mera, për episodin që çoi në përjashtimin me karton të kuq të Vinicius Juniorit në ndeshjen mes Real Madridit dhe Villarrealit.
Gjatë komunikimit me gjyqtarin, arbitrat e VAR-it i kërkuan atij të rishikonte pamjet për të vlerësuar një veprim të mundshëm të dhunshëm në aksionin që çoi te goli.
“Isidro, të rekomandojmë një rishikim për të vlerësuar një sjellje të mundshme të dhunshme gjatë aksionit të golit”, dëgjohet t’i thonë arbitrat e VAR-it.
Pasi mbërriti te monitori për të parë përsëritjet, Díaz de Mera u informua më konkretisht për atë që kishte ndodhur.
“Sipas pamjeve që po vëzhgojmë, Vinicius e tërheq lojtarin e Villarrealit nga flokët”, i shpjeguan arbitrat e VAR-it. “Perfekt, e pashë”, u përgjigj gjyqtari kryesor.
Më pas, nga VAR-i iu bë e qartë se episodi ishte pjesë e së njëjtës fazë loje me aksionin që çoi te goli.
Pas shqyrtimit të pamjeve, Díaz de Mera komunikoi vendimin e tij: “Për mua, do ta rinis lojën me goditje dënimi dhe karton të kuq për numrin 7 të ekipit vendas”.
Vendimi u konfirmua edhe nga arbitrat e VAR-it, të cilët u përgjigjën shkurt: “Në rregull”.
Publikimi i audios zbulon komunikimin mes gjyqtarëve dhe arsyetimin që çoi në përjashtimin e Vinicius Juniorit, në një episod që pritet të vazhdojë të diskutohet në Spanjë.
