Trump do ta mirëpriste Fetterman-in në Partinë Republikane: “Do të më pëlqente”
Presidenti Donald Trump tha të shtunën se do ta mirëpriste senatorin demokrat të Pensilvanisë, John Fetterman, nëse ai do të ndërronte partinë politike, duke e përshkruar atë si “djalë të shkëlqyer”.
Trump u pyet nga një gazetar pasi zbriti nga Air Force One në bazën ajrore Andrews të shtunën, pas kthimit nga tubimi në Tenesi, nëse kishte folur me Fetterman — i cili ka thyer vazhdimisht rreshtat me demokratët gjatë sesionit aktual të Kongresit — për t’u bërë republikan dhe nëse do ta mirëpriste një ndërrim të tillë. “Do të më pëlqente. Mendoj se është i shkëlqyer,” u përgjigj Trump, siç njofton New York Post.
“Do të jetë e vështirë për të të marrë nominimin si demokrat, por do të më pëlqente ta kisha si republikan,” shtoi presidenti, i cili e përshkroi Fetterman-in si “njeri shumë të fortë” me “prindër madhështorë”, me të cilët tha se kishte folur më parë. Trump sugjeroi gjithashtu se ndërrimi i partisë do ta ndihmonte politikisht senatorin: “Nëse shikoni sondazhet, ai performon më mirë si republikan sesa si demokrat.”
Komentet vijnë në një kohë kur Fetterman ka thyer vazhdimisht rreshtat me partinë e tij për çështje kyçe, përfshirë luftën me Iranin dhe emigracionin, ndonëse vazhdon të votojë me demokratët në shumicën dërrmuese të rasteve. Që kur hyri në Senat në 2023, ai ka votuar me demokratët e Senatit në afro 90% të rasteve, por gjatë sesionit aktual kjo shifër ka rënë pak nën 81%, sipas New York Post.
Spekulimet për një ndërrim të mundshëm janë ushqyer edhe nga lëvizje të tjera të tij: muajin e kaluar Fetterman regjistroi një video ku prezantonte senatorin republikan Dave McCormick në Konventën Republikane të Mesmandatit, dhe në një paraqitje publike u referua gabimisht vetes si “republikan i përjetshëm”. Raportohet gjithashtu se ka përdorur platforma republikane për mbledhje fondesh dhe mban një miqësi të ngushtë me senatoren republikane Katie Britt të Alabamës.
